CCM watwangana makonde hadharani

Vvurugu kubwa zimeibuka katika uchaguzi wa kuwania nafasi ya Baraza Kuu na Mkutano Mkuu Taifa wa CCM uliofanyika jana katika viwanja vya Karimjee, jijini Dar es Salaam baada ya wapambe wa wagombea wawili kuchapana makonde hadharani.
Uchaguzi huo uliokuwa ukitafuta wawakilishi wa nafasi mbalimbali za Umoja wa Wazazi Mkoa wa Dar es Salaam na kusimamiwa na Mbunge wa Ilala, Musa Zungu, ulilazimika kurudiwa baada ya wagombea wawili kupata alama sawa.

Kabla ya kurudi katika ukumbi wa uchaguzi majira ya saa 9:10, vurugu zilianza kujitokeza ambapo wapambe wa mgombea Salim Salim ‘Chicago’ walikuwa wakihaha kuhakikisha anaibuka kidedea.

Hata hivyo mpambe wa mgombea mwingine, Nicolaus Msemo, alikuwa makini na kumfuata mtu mmoja aliyejulikana kwa jina la Idd Toatoa na kuanza kupigana naye kabla ya kuamuliwa na wanachama waliokuwa karibu yao.

Nafasi ya uwakilishi wa Baraza Kuu mkutano mkuu Taifa kupitia Jumuiya ya Wazazi mkoa huo ilikuwa ikiwaniwa na wagombea wanne ambao ni Salim Chicago, Msemo, Mohmed Honelo na Tambwe Hizza.
Honelo na Tambwe walienguliwa mapema kutokana na kura zao kuwa chache huku wagombea hao wawili wakirudi katika uchaguzi.

Aidha, nafasi ya uenyekiti Umoja wa Wazazi Mkoa wa Dar es Salaam ikichukuliwa na Mbunge wa Afrika Mashariki, Angela Kiziga aliyeibuka kidedea kwa kura 170.

Naye Mwenyekiti wa Umoja wa Wanawake (UWT) CCM mkoani Dar es Salaam, Zarina Madabida, aliyekuwa akitetea kiti chake, ameanguka na nafasi yake kuchukuliwa na Janeth Masaburi, Mke wa Meya wa Jiji la Dar es Salaam, Didas Masaburi.


Wakati Mama Madabida akianguka, vurugu kubwa zimeibuka katika uchaguzi mwingine wa CCM uliofanyika jana katika viwanja vya Karimjee baada ya wapambe wa wagombea wawili wanaowania nafasi ya Baraza Kuu na Mkutano Mkuu Taifa kuchapana makonde hadharani.

Zarina ambaye anakuwa mwenyekiti mpya wa umoja huo mkoani Dar es Salaam, aliibuka na ushindi wa kura 168 dhidi ya 140 za Mama Madabida, huku Irine Makinda akiambulia kura tatu tu.

Uchaguzi huo uliotawaliwa na vituko, vijembe na kejeli za aina yake kutoka kwa wafuasi wa pande hizo mbili, ulifanyika jana katika viwanja vya Sabasaba jijini Dar es Salaam.

Awali kabla ya matokeo hayo kutangazwa baadhi ya wajumbe waliangua vilio kupinga ushindi wa Mama Masaburi, huku waliounga mkono hata kabla ya msimamizi wa uchaguzi, Mkuu wa Mkoa wa Dar es Salaam, Mecky Sadick kutangaza matokeo, walikuwa wakiimba na kucheza kushangilia ushindi.

Shangwe, nderemo na nyimbo za taarab zilianza kusikika hata kabla na baada ya mshindi kutangazwa huku wajumbe wengine wakirusha maneno na kudai kuwa salamu zimfikie Sophia Simba ambaye ni Mwenyekiti wa UWT Taifa anayetetea kiti chake.
Hata hivyo baada ya kutangazwa mshindi baadhi ya wajumbe wa uchaguzi huo walipiga vijembe na kudai kuwa watu wanaotaka kuiongoza CCM kama chama chao ujumbe uwafikie kwani wajumbe wa sasa sio wa zamani.
“Habari ndio hiyo na iwe chachu ya mabadiliko kwa CCM na wakae wakijua kuwa CCM ya zamani sio ya sasa, walifanya chama kama chao sasa ni mabadiliko tu,” ilisikika sauti ya mmoja wa wajumbe wa uchaguzi huo.
Naye Katibu wa UWT tawi la Kimara, Royita Phares, alisema kilichosababisha anguko la Mama Madabida ni hatua yake ya kuingilia uchaguzi wa wilaya.
Naye, Mama Madabida alisema kama wanachama wakizungumza kupitia kura zao, mambo yanakuwa yameisha na kinachofuata ni kujenga jumuiya imara na kutoruhusu kukatika vipande.
Mwenyekiti mpya mama Masaburi aliwataka wanachama wa umoja huo kuvunja makundi kwani muda wa majungu umeshaisha.
Katika nafasi zingine zilizogombewa ni vijana iliyochukuliwa na Hawa Chakoma, Wazazi Mkoa ikienda kwa Amina Mlewa, Baraza Kuu la UWT Taifa ikienda kwa Naibu Waziri wa Sheria na Katiba, Angellah Kairuki, nafasi ya mkutano mkuu wa CCM Taifa ikienda kwa Dorothy Kilave