Malawi yamfukuza balozi wa Tanzania nchini.humo

Yadaiwa amepewa saa 48 kuondoka

Balozi Patrick Tsere

Kuna taarifa ambazo bado hazijathibitishwa kutoka Ikulu ya Malawi kuwa. Malawi imeamua kumfukuza balozi wa Tanzania nchini Malawi Patrick Tsere.
 
Kwa mujibu wa habari zilizochapishwa na gazeti la Malawi Voice la nchini  Malawi  Tsere amepewa saa 48 aondoke nchini Malawi.

Hatua ya kumfukuza balozi huyo unafuatia mgogoro wa mpaka wa Ziwa Nyasa baina ya Tanzania na Malawi.

Gazeti hilo linaripoti Malawi imechukua hatua ya kumfukuza balozi huyo kufuatia mahojiano aliyoyafanya na Radio Zodiak ambapo alisema kuwa Ziwa Malawi au Nyasa linamilikiwa nusu na Malawi na nusu ni sehemu ya Tanzania.

Hatua ya kumfukuza balozi zinakuja siku chache baada ya Rais wa Malawi Joyce Banda kutangaza nchi yake kujitoa katika mazungumzo baina ya Tanzania na Malawi kuhusu mpaka wa ziwa hilo.

Akiongea na waandishi wa habari mjini Lilongwe Bi Banda alisema nchi yake imeamua kujitoa katika mazungumzo hayo kwa vile Tanzania imepeleka wanajeshi wake kwenda kufanya doria na pia kuchapisha ramani inayoonyesha kuwa mpaka wa ziwa Nyasa au Malawi upo katikati ya ziwa.

Balozi Patric Tsere kushoto akizungumza na waziri  Mkuu wa Tanzania Mizengo  Pinda

Bi Banda aliilaumu Tanzania kwamba imekuwa kigeugeu kwenye mazungumzo hayo .

Hatua ya kufukuzwa kwa balozi  huyo wa Tanzania inakumbusha hatua kama hiyo ambayo ilichukuliwa wakati wa utawala wa Marehemu Bingu wa Mutharika ambaye alimfukuza Balozi wa Uingereza nchini humo.